Kaffi kaffi kaffi

Ef þið drekkið kaffi og elskið það jafn mikið og ég, þá eigið þið eftir að kunna að meta þennan eftirrétt. Hrikalega einfaldur og góður og hentar handa öllum, ja sem vilja kaffibragðið allavega. Haldið ykkur fast.

Mokkabúðingur

 

360 ml rjómi
60 gr erythritol
3 tsk instant kaffi
3 stór egg
30 gr gott kakó
1 tsk vanilludropar

 

Aðferð:

Hitið allt í potti nema kakóið, passið að láta ekki sjóða og hrærið stöðugt í blöndunni.

Þegar búðingurinn fer að þykkna aðeins, þá má sigta kakóinu í, hræra áfram vel og hella svo í litlar skálar eða bolla. Mér fannst gott að skella honum í frystinn í sirka 2 tíma. Fullkomið með rjómaslettu.
Þetta var útgáfan með kaffinu, en svo gerði ég aðra með engu kaffi og það var alveg ljómandi gott líka, bara ekta súkkulaðibúðingur :)  

 

Þetta var eftirrétturinn hjá okkur eftir "Stjána bláa kjúllann" sem er að komast á uppáhaldslistann hér á heimilinu. Smá upprifjun:

Spínatpoki, kjúklingur, jalapeno ostur, rjómi, pipar, hvítlaukur, beikonkurl.

Meðlæti: Hvítlauksbrauðið góða sem ég gerði núna með möndlumjöli sem ég malaði sjálf.

Mjög gott að hafa það bara frekar grófmalað, hef sjaldan séð þetta hverfa jafnhratt af borðinu.

Uppskrift:

dugar á litla bökunarplötu, 2 faldið ef þið viljið meira magn

 

6 tsk möndlumjöl (grófmalað)

1 egg

2 dl rifinn ostur

hvítlaukssalt 1/2 tsk

 

Blandað vel saman í skál og svo dreift úr þessu á bökunarpappír, þetta er frekar laust í sér til að byrja með en svo jafnar deigið sig út í ofninum og rennur saman í þessa dásemd. Bakað í 180-200 gráðu ofni í 10 mín sirka, skorið niður í lengjur og svo má skella því smá stund í viðbót í ofninn, þá verður þetta enn stökkara og gott að losa í sundur.