Sunday, May 12, 2013

Þynnkuborgarinn

Já það kemur fyrir að dagarnir byrja þunnir eftir skemmtileg kvöld og þá kallar mallinn minn á eitthvað sveitt og gott. Þessi hamborgari kom því sterkur inn og ég reif mig upp í morgunsárið til að baka eftir uppskrift frá henni Lilju sem er orðin ansi sleip í hamborgarabrauðuppskriftum.
 Borgarinn ( keyptur í Víði ) ofsalega góður og án aukaefna. Hvítlaukssteiktir sveppir, beikon extra þykkt, BBQ sósa sem notuð var á Klístruðu kjötbollurnar hér á undan, mæjónes, ruccola, hamburge dill chips, kokteiltómatar,ostur og piprað avocado. Bjargaði alveg heilsunni minni. Auðvitað setjið þið á ykkar borgara það sem er uppáhalds en þessi var eðal.
 Hamborgarabrauð, gerir 5 brauð
2 egg
3 dl möndlumjöl
5 msk husk trefjar
2 tsk lyftiduft
1 tsk salt
2,5 dl soðið vatn
sesamfræ (valfrjálst)


Aðferð:
1.  Þurrefnunum er blandað saman í skál
2.  Egg sett útí og hrært saman
3.  Soðið vatn hrært saman við.

4.  Búið til bollur, deigið er mjög blautt samt svo það er nóg að setja góða slettu á
smjörpappírsklædda plötuna og dreifa aðeins úr því. Hér dreifði ég smá sesamfræi á hverja bollu.
5.  Bakið við 180 gráður í 35 mín.

Hér er svo önnur útgáfa af hamborgarabrauði úr hörfræmjöli ( Golden Flax seed frá NOW )

Hörborgarar:

70 gr Golden Flax eða venjulegt hörfræmjöl
1 1/2 tsk laukduft
1/2 tsk salt
1 tsk lyftiduft
2 dropar stevia, ( má sleppa )
3 egg
1-2 msk vatn
2 msk olía
sesamfræ ofan á


Blandið öllu vel saman í hrærivél, leyfið deiginu að standa aðeins ef þið notið ekki form
og bakið í 15-20 mín á 180 gráðum, 170 sirka með blæstri
Má setja beint á bökunarpappír í háa hrúgu, leyfa deiginu að leka aðeins út í ofninum. Nú eða
fjárfesta í hamborgarabrauðsformi í Kosti, ekki nauðsyn samt. Ég setti smá sesamfræ ofan á :)
Ég myndi segja að þetta séu um 3-4 hamborgarabrauð.
 
 

 
Eftirréttur:
 
Kókosrjómi með piparmyntusúkkulaði og kókos.
Þetta er eins einfalt og nafnið ber með sér.
 
Þeyttur rjómi, má setja smá vanilluduft í hann.
Kókosflögur frá Himneskri hollustu
2-3 molar rifið piparmyntusúkkulaði frá Valor
Allt sett í skál og annaðhvort kælt í smá tíma eða bara neytt strax.

No comments:

Post a Comment