Thursday, January 8, 2015

Blaðlaukssúpa með kúrbítsnúðlum

Jæja þá er komið að súpudögum, súpa og sítrónur í vatni, alla daga :) Nei grín, en það er mjög gott að byrja daginn reyndar á blessuðu sítrónuvatninu og hafa það volgt, skera svo sítrónurest í sneiðar og geyma í könnu með vatni og gúrkusneiðum. Þetta má svo drekka yfir daginn og líðanin verður mikið betri, segjum það bara. Nú, ég fékk svona fyrirtaks uppskrift af blaðlaukssúpu frá Kötlu systur fyrir nokkru og ákvað að fikta aðeins við hana eins og vanalega til að gera lkl vænni. Í stað þess að nota kjúklingabaunir eins og hún þá ákvað ég að nota kúrbítsnúðlur til að fá smá bit í súpuna og gera hana matarmeiri. Þetta kom ljómandi vel út skal ég segja ykkur. Súpan er rosalega góð, bragðmikil. Þetta er stór skammtur sem dugar vel í hádeginu daginn eftir. Bollurnar eru ljómandi fínar sem meðlæti og í þetta sinn notaði ég dökkt möndlumjöl sem gerir þær dekkri að lit en vanalega hjá mér.

 
 Blaðlaukssúpa með kúrbítsnúðlum
 
smjörklípa
1 1/2 líter sjóðandi vatn
2 dl rjómi
2 tsk þurrkað timiankrydd
2 kjúklingakraftsteningar (má nota aðrar gerðir)
2 tsk paprikuduft
1 blaðlaukur
1 lítill gulur laukur
2 msk beikonsmurostur eða annar rjómaostur
2 msk sýrður rjómi
salt og pipar eftir smekk
 

1 "núðlaður" kúrbítur
 
Aðferð:
Steikið lauk og blaðlauk í smjöri, ég nota þykkbotna pott úr IKEA og þarf þá ekki að færa á milli íláta, allt í einu lagi.
Kryddið með kryddunum og leyfið lauknum að verða glær. Hellið þá vatninu yfir, rjómanum og rjómaostinum síðast. Látið súpuna malla í 30 mín sirka og þá er hún tilbúin.
Hægt að borða eina og sér en mér fannst mjög gott að hella henni yfir kúrbítsnúðlurnar mínar.
 
Núðlur:
 
Látið núðlurnar í skál og stráið sjávarsalti yfir, leyfið núðlum að svitna í 10-15 mín og skolið svo vel.
Þá eru þær tilbúnar í salat, pasta eða í svona súpu eins og hér um ræðir.



Létt og góð frærúnstykki um 6 stk.
 
100 g sýrður rjómi
2 egg
15 g kókoshveiti
15 g möndlumjöl ljóst eða dökkt, smekksatriði
5 g fínmalað HUSK eða kúfuð tsk
1/4 tsk salt
1/2 tsk lyftiduft
1 msk chiafræ
1 msk hörfræ
1 msk graskersfræ

Aðferð:
Hrærið vel eggin og sýrða rjóman, blandið svo þurrefnum vel saman með gaffli svo HUSK nái að blandast vel.  Hellið þeim út í og hrærið áfram. Látið standa í 5-10 mín. Setjið deigið í muffinsform, ég notað smurt silikonform og stráði nokkrum graskersfræjum ofan á.
Bakið í 20  mín á 180°C með blæstri. Það komu 6 agalega passlegar bollur úr þessari uppskrift, svo er bara að tvöfalda ef þið viljið.

No comments:

Post a Comment